Eva Fonda:
National Myth (Pambansang Laman)
Si Eva Fonda, ang porn sa primetime bida. Si Eva Fonda, ang babayeng dai nasusupog. Si Eva Fonda, sisay siya? Si Eva Fonda, sarong national myth. Bistuhon ta siya, ang pambansang laman kan Pilipinas.
Enot, ano ang inaapod na national myth o pambansang mito? Ano ta kaipuhan ta kaini? Kung ang mga hapones nagsasabing sinda mga aki nin makapangyarihang aldaw, sain ta ilulugar ang satong pagka-pilipino? Ang pambansang mito iyo ang pagtubod o istorya ning pinaghalean kang sarong grupo ning tawo asin kang sarong kultura. Kadakulon ta ning mga alamat tungkol sa pinunan kang mga bulkan, mga pananom, etc. alagad ni minsan mayo nagkusog boot na magsurat ning istorya tungkol sa Pilipino o sa Pilipinas. Tano ta ang Bulkang Mayon may alamat pero ang Pilipinas asin ang Pilipino mayo? Tano ta ang pinya na saro sanang kakanon may alamat ning pinaghalean?
Ang pambansang mito sarong importanteng bagay sa pagkakasararo kang sarong nasyon. Aanuhon man kang pinya an saiyang alamat? Tano naghihirilingan ang mga pinya sa ibang bansa? Tano ang mga pinya na hale sa daet, pag inexport maistorya sa mga dayuhang pinya kang saindang pinaghalean? Dai, ang mito dai kaipuhan kang sarong kakanon. Ang mito kaipuhan kang mga tawo. Ini sarong palatandaan kang saiyang pinaghalean kung saen man iyang panig kang mundo.
Kita nangangaipo ning mito. Ang pagkakaigwa ning pambansang mito sarong paagi ning pagpapakusog kang satong kultura asin pagka Pilipino. Ang ideya na gabos na tawo sa 7,107 na isla kang pilipinas may saro lang na pinaghalean ang mas mapatibay pa sa bugkos na nagsasararo sa mga Pilipino. Ang ideya na kamo, bicolano man o Cebuano o Ilocano, magturugang asin may sarong pinaghalean, garo sarong rugby na dawa na ngani metal o kahoy kayang pagdukuton, na kita dawa may kaniya-kaniyang diyalekto, hale sa iba-ibang isla, naglalakaw sa sarong banwaan, ang banwaan ning Pilipinas, ang banwaan ning Pilipino.
Mas kinakaipo ta pa ngunyan ang siring na pagtubod asin kaisipan. Kaipuhan ta ngunyan magkasararo bilang Pilipino para sa Pilipinas. Ang banwaan ta pati kitang mga tawo kadakulon inaagihan na problema asin mga krisis. Nin huli a man sana sa mga siring na krisis, diit-diit na nagagaba an satuyang komunidad.
Alagad dawa na ngani kita dakulon problema, nakukua ta pang mahumaling sa kulturang popular. Ini dara na man sana kang grabeng kapitalismo sa bansa. Ang bunga kaini masasabing may maraot alagad may magayon man. Ang padiit-diit na pagkawasak kang tunay na kulturang Pilipino saro na sa mga nangaging problema. Masasabi na ang kulturang popular equivalent na sa kulturang Pilipino. Nalalamos na kita sa dagat ning pop culture. Hinahangos ta ini, kinakakan, hinihiling, iniinom, asin sinusulot. Ang sinulot ni anne Curtis ngunyan sulot na kang buong banwaan sa mga masurunod na aldaw. Ang bagong pelikula ni piolo pascual asin angel locsin laman kang mga urulay ulay sa eskwelahan man o sa opisina o sa saodan. Ang kulturang popular sinasararo ang mga Pilipino. Mag chismis man iyan o bagong porma, pelikula, teleserye o mga kanta, tataramon o sarong konsepto. Digdi kita napapapundo sa kung ano man ang ginigibo ta. Su sinasapna natutong na ta the end daa kan dyosa, dai pwede palampason. Su assignment dai na tinapos ta nadangog na ang boses ni kris Aquino, dali! Deal or no deal na. Su labahan, saaga na lang ta dai pwede palampason ang paggayon ni heart evangelista sa luna mystika. Makulog man sa boot pero ang katotohanan, mas aram pa kang mga tawo ang mga karakter sa mga teleserye kesa sa satuyang mga bayani. Mas enjoy daa dalanon ang mga drama sa telebisyon kaysa magbasa ning noli me tangere.
Ang kultura ning pagkahilig sa mga teleserye asin mga drama talamak digdi satuya. Sa mga palabas sa telebisyon, sarong pangaran ang maribok na maray. Si Eva Fonda. Sisay si Eva Fonda? Habang naglalakaw ako sa sarong mall kaibahan ang saro kong barkada, may litrato na nakakua kang saiyang atensyon. ‘O! Si Eva Fonda baga yan!’ Alagad ang tinutukdo niya sarong modelo ning tsinelas. Sisay baya si Eva Fonda? Siya baga iba man ki Christine Reyes? Tano ta Eva Fonda ang pagkakabisto saiya kang mga tawo apisar na Cristine Reyes ang totoo nyang ngaran? Tano ta bukang bibig siya kang mga tawo? Anong igwa si Eva Fonda na mayo ki Betty La Fea?
Saro sa pinakasikat na hapot ngunyan iyo ini: kung ika ang hahaputon, sisay ang saimong pipilion? Si Betty La Fea na matalino pero pangit? O si Eva Fonda na magayon, inaapi, alagad naglalaban? Halos gabos mas pipilion si Eva Fonda. Iba na talaga ang panahon ngunyan. Sabi ngani kang iba, magayon na magdalan tv pagkabanggi ngunyan ta may porno na sa primetime bida. Ang mga teleserye sa primetime bida na kuta na general patronage, iba na man ngunyang mga panahon na ini. Kung kaito nagsasarayad pa sa daga ang mga badong sulot kang kababaihan, ngunyan, si Eva Fonda nagdudurudalagan na kulang-kulang ang saplot. Nag-abot na man nanggad kita sa panahon ning pagkagaba kang mga konserbatibong paagi asin pagtubod. Haputon mo ang Kapamilya channel, masabi pa iyan na konserbatibo sinda asin ang saindang palabas pinoprotektahan ang kaakian alagad pinasale ninda sa tv si Eva Fonda asin ang ilusyon niya na naglilitong-litong sa dagat, nagtutukaan. Iyo na ini ang suhestiyon ninda na akuon ta bilang konserbatibo asin maray na kaledad ning palabas. Alagad, tano ta padagos na sinusubaybayan kang mga Pilipino ang buhay ni Eva Fonda?
Ano ang papel kan Eva Fonda sa telebisyon? Ang pagpapahiling kaini kadakol ning mga implikasyon. Ang mga maseselang isyu sa komunidad asin sa modernong panahon saro sana sa mga mapupuna sa Eva Fonda. Ang teleserye na ini sarong paagi ning pagpapatanggap sato kang kapitalismo ning mga bagay na dai man dapat pampubliko. Saro na sa mga ini ang pornograpiya. Ang kadiit na laman na pinapahiling sa Eva Fonda nagdadakol sa kada episode. Alagad nakakamundong sabihon na ini tanggap na kang mga Pilipino. Nakakamundong sabihon na ini mas tinatangkilik. May thrill daa kaya. Bakong old-fashioned. Bagay daa kaya sa modernong panahon. Bagay daa kaya sa modernong tao. Alagad ang hapot, ano an modernisasyon? Kun arog kaini an sitwasyon, ano na lang palan ang dapat kong asahan saaga? Baka sa masunod na sampulong taon, huruba na ang mga tawo naglalakaw sa dalan. Mayong maraot sa pagpapahiling ning laman sa telebisyon. Sabi ngani kang iba dyan, art daa. Ang maraot digdi, ang babae sa telebisyon, na nagdadalagan nin halos huba na, nagpapababa sa papel niya sa mundo. Ang babae nangagi na sanang object of desire. Ang sitwasyon na siring binibrainwash ang mga tawo na ini na ang bagong babae. Ang bagong babae, palaban, mayong takot, kaya naglalakaw sa dalan na kulang kulang ang saplot sa hawak. Makangirit baga ano? Tano man daa kaya siya masusupog, flawless man daa siya. Pobre lang daa kaya siya kaya tipid sa tela. Mayo na pambakal bado kaya parakit na ang kamison. Iyo, pwede ta ini ngiritan sa ngunyan. Magngirit lang kita. Akuon ta ang kulturang popular. Popular ngani baga. Makisunod kita sa uso. Alagad, kung an pitong-anyos mo nang aki o tugang ang nag-aarog ki Eva Fonda, mangirit ka pa kaya? Kun ang bunso mong tugang naghahagad na ning blouse na plunging ang neckline, mangirit ka pa kaya? Makatakot asin makamundong isipon. Ang Eva Fonda na porn daa sabi kan iba, sikat na maray sa mga Pilipino dawa baga su mga yaon sa ibang nasyon nagsusubaybay, may TFC na man daa kaya especially made para sa mga OFWs ta.
Dakulang hapot asin laman kang mga iristoryahan, ano ang igwa si Eva Fonda? Sisay baya talaga ining babae na ini? Sa sarong promotion kang Kapamilya station, pinahiling ang mga interbyu kang mga tagasubaybay kung tano ninda sinusubaybayan si Eva Fonda. Si Eva Fonda magayon na babae. Siya pobre lang alagad may diskarte sa buhay. Si Eva Fonda palaban. Dai siya nagpapaapi sa kun sisay man. Siya may pangarap sa buhay asin ining pangarap na ini pinagtatrabahuhan niya. Si Eva Fonda may magayon na boot. Siya may prinsipyong kinakaputan. Si Eva Fonda, sa madaling sabi, sarong perpektong litrato kang idealismo kang babaeng Pilipino. Ang saiyang kagayunan hinahangaan. Ang saiyang kusog ning boot kinabibiliban. Ang saiyang higos asin paglapigot sa buhay tinitingala. Ang saiyang katauhan pinapangarap. Sa siring na paagi, an istorya kan buhay ni eva fonda nagtatao ning pag-asa sa mga Pilipino.
Ang istorya ni Eva Fonda bako lang istorya niya. Ang istorya na ini, istorya ta gabos. Ang pagkalugmok asin ang pagbuhat liwat istorya ta gabos. Kung hihilingon, si Eva Fonda pwede man gibuhong sarong panalmingan nin satuyang banwaan. Si Eva Fonda, maihahambing sa satuyang bayan. An inang bayan bilang si Eva Fonda. Si Eva Fonda bilang istorya kan lahing Pilipino, sarong mito na gabos ugwa ning interes. Siya sarong mito na pati sa mga kaakian patok. Siya sarong mito na kabibistuhan ning kulturang Pilipino. An hapot na lang, pwede ta daw na magibo o ma-apply an rebirth na inaapod sa teleserye na ini sa satuyang banwaan na sa presenteng panahon lugmok? Iyo na ini, kun sakali, ang maaapod na tunay na mito, pambansang mito. Kita magkasararo sa pagbuhat liwat kang satuyang banwaan. Kung ang mito maging totoo, si Eva Fonda bako na lang pambansang laman kundi pambansang mito. Sa siring na paagi, maray ang kulturang popular. Siya sarong mito na maburunyog sa satuyang mga Pilipino. Ang paghibi ni Eva Fonda, hinihibian ta man nyato. Ang pagkaogma niya, kinaoogma ta man nyato. Ang anggot niya satuya man na namamatean. Bako man lang kita na yaon digdi sa pilipinas an nakikidamay sa saiyang mga pinag-aagehan. Sa tabang kan teknolohiya, an Kapamilya shows yaon na pati sa iba ibang panig kan mundo. Siring kaini, abot na abot na daa gabos na Pilipino. Ang pagkasararo asin ang pagbuhay liwat kang banwaang Pilipinas pwede man baga, ano?
Magayon na bagay ang pagkakasararo. Dawa baga kung ano pa man iyan. Kung ang mga teleserye ang makakagibo kaini, maogma na ako. Kung ang Eva Fonda makakapagsararo sa mga Pilipino, padagos tang tangkilikon ang siring na palabas. Alagad dai ta man giraray paglingawan ang mga values kang pagiging Pilipino. Kung ang Eva Fonda magiging national myth, sana ini pambansang mito, bakong pambansang laman. Sana, siring man kang Pilipinas asin lahing Pilipino, ang pagkadapla ni eva fonda, masusundan nin liwat na pagbuhat asin pagtindog. Sana, sa kada episode na dinadalan ta, makakua man kita ning mga mahahalaga asin mga kapakipakinabang na leksyon sa buhay. Sana ang idealismo kan teleseryeng Pilipino dai lang mamugtak sa telebisyon kundi maging gabay ta sa pagatobang sa masurunod pang aldaw, may krisis man o mayo. Pabayaan tang magdanay ang mga magagayon na values na pinapahiling ni Eva Fonda sato, bako sana ang laman na nahihiling. Dai ta pagnasaan ang kagayunang panluwas ni Eva Fonda, pagnasaan ta ang saiyang kagayunan ning boot. Pagnasaan ta ang saiyang marhay na ehemplo, ang paglaban para sa ikamamaray kang buhay, ang pagbuhat na liwat hale sa pagkadaphag.
Alagad, dawa na ngani arog kaini, dai ta man sana malingawan ang mga tunay asin mas importanteng kaugalian asin kultura ta bilang sarong Pilipino. Si eva fonda, saro sanang instrumento para mabuhayan kita ning boot sa maliwanag na potoro. Ang Eva Fonda saro sanang stepping stone para ma-achieve ta ang mas hararom na bagay, ang pagbuhat kang lahing Pilipino, ang pagbuhat sa satuyang inang bayan, ang pagbuhat sa Pilipinas, ang pagnuhat sa satuyang mga sadiri. Tawan ta ning bagong buhay ang satuyang minamaw-ot na bayan, rebirth kung baga. Itao ta saiya ang pagpapahalaga na dapat. Pagdanayon ta ang pag-asa na tinatao ni Eva Fonda.
No comments:
Post a Comment